Poema oso bat dela esan genezake. Nolabaiteko joera epikoa nabar daiteke. Baina lirika bidetik doazen poematxo eta zatiak ez dira gutxi. Poeta "Notre Dame" katedral ospetsuaren aurrean dago, eta bere irudimen poetikoa Errezildik, Compostelatik eta Paristik joan etorrian dabil. Poetak, pintoreari dioenaren bidez, lirika bidea joarratu nahi du, baina gertakizunen, errealitate historikoaren ibaiak bere uretan murgilarazten du. Sinboloak eta alusioak nahiko argiak dira gehienetan. Bestalde, epiko giro horrek berak gertakizunak urrunarazi egiten ditu, giro mitiko, irreala sorraraziz. Honela, errealitatearen eta amets-giro edo irrealitatearen mugak desegiten dira nolabait. Gizonaren egiazko sena joku horretatik kanpo dagoela adieraziz agian?