Zein da turista eta bidaiariaren arteko desberdintasuna? Turista atzerrira heltzen den lehenengo egunetik etxera bueltatuko den momentuari buruz pentsatzen ari da, baina bidaiaria baliteke atzerrian betiko geratzea. Esaldi hori gogoan iltzaturik abiatu da bidaztia. Arina du ekipaia, harako poeta hark bezala. Aurrera egin ahala, gero eta hutsago ditu alforjak, baina gero eta beteago esperientzien zorroa: inondik ere mugarik ez duela dirudien desertuan igarotako egun lehor-beroak, mila izarreko hotelean –zerua sabaitzat– emandako gau luzeak eta, batez ere, hango eta hemengo jendearekin izandako solas eta hartu-emanak. “Tubabu! Tubabu!” esango diote ibiltariari Maliko haurrek, gizon zuri bat ikusita begi-zabalik. Handiak dira tubabua bertako biztanleetatik bereizten duten kulturazko eta gizarte-baldintzak baina, hala ere, garbi ikusiko du, arrazen gainetik, adiskidetasunak elkar ditzakeela nonahiko gizon-emakumeen bihotzak.

Jon Arretxe (Basauri, 1963) Bidaietako kronika eta fikzioen egile moduan eman zen ezagutzera: Tubabu, Tuparen seme-alabak, Ekialdeko mamuak, Griot, Zazpi kolore, Urrezko triangelua, Oroituz; umorezko lanak ere idatzi ditu: Ostegunak, Ostiralak, Larunbatak; baita eleberri beltzak ere, dela umore kutsukoak: Manila konexioa, Kleopatra, dela bidaietan oinarrituak: Morto Vivace, Fatum, Xahmaran.