Urtetan bildu dira Benito Lertxundi, Pako Aristi eta Mikel Markez: hilero-hilero, bakoitzaren herrian txandaka, lasai bazkaldu eta bazkalondo luzean hitz-aspertu bat izateko, honetaz eta hartaz. Aristi eta Markez pribilegiatuak sentitu ziren, Benito intimo eta hurbil bat ezagutzeko aukera izan zutelako, oso jende gutxik bezala, eta pentsatu zuten solasaldi haietan oinarrituta liburu bat egitea.

(Errenteria / Gipuzkoa, 1971). 1971ko urriaren 4an jaio zen Errenterian. Hamabost urterekin gitarra jotzen eta lehen kantuak egiten hasi zen, jendaurreko kantu saioak eskainiz. 1989an egin zuen lehen grabaketa. Bere agerpena harrigarria izan zen, rock eta folk taldeak modan zeudenean azaldu baitzen bere gitarrarekin, aspaldiko kantautoreen moduan, baina jende gaztearekin berehala konektatu zuen kantu erromantiko eta sentimental haien bidez.

Euskal Herriko txoko gehienetan kantatu du Mikel Markezek eta zuzenean nahiz diskotan euskal musikari gehienekin kolaboratu izan du, aldi berean, letrak ere idatzi ditu hainbat bakarlari eta taldeentzat.

Ahots gozoa dauka, ondo modulatzen duena, eta beti asmatu izan du ahots horri zegozkion musika tresna eta arregloak lortzen.

Urteen poderioz, bere gaiak eta kezkak zabaltzen joan dira. Esan liteke maitasunaren inguruan pibotatzen zuen kantagintza zabaldu egin duela gai sozialak sartzeko, gai politikoak, bizi garen gizartearekin kritikoak diren gaiak; horrela lortu du belaunaldi batentzat zirudien kantakerari iraupen generazionala ematea, lanaren eta ikerketaren bidez inspirazioaren edertasun puntuala gaindituz.

Euskal Herritik kanpo, Kuban, Argentinan, Venezuelan, Estatu Batuetan, Frantzian eta Espainian eman ditu kontzertuak.