Azkenurriko eskolako gela berezi batek, Barrakoiak, hainbat ikasle “txar” eta atzerritar jaso ditu. Gela horri buruzko iritzi eta metodo kontrajarriak erakutsiko dituzte eskolako zuzendariak eta Felipe maisuak. Ikasleek hiztegi sekretu bat osatu dute beren hizkuntzetatik hartutako berbez. Horrek eman dio liburuari izenburua.

Halako batean, ikasgela berezi horretan Mei agertuko da, neska antisozial eta isila. Baina baita gaitasun bitxi baten jabea ere: gizakiekin komunikatzeko aukera gutxi izanik, zomorroekin hitz egiten du. Trebetasun horrek egoera harrigarriak sortuko ditu. Argumentuak Meiren bizitzaren eta nortasunaren bilakaera kontatzen du, betiere eskola ardatz eta ikaskideak aldi berean kontraste eta koru. Narratzailea Lukas da, Meiren lagun eta mireslea.

Errenterian jaio zen 1963an eta Bermeon bizi da 1991 urteaz geroztik. Filologia Hispaniarra ikasi ondoren, zenbait institututan ibili zen irakasle. Gaur egun ISEI-IVEI erakundean lan egiten du. Gaztetatik gustuko izan du idaztea, eta bilduak ditu sari eta argitalpen batzuk. 1988an "Bapore saria" irabazi zuen Printzesa puzkertia narrazioarekin.

 

Bere lanen artean: Benetako pirata (2001, Elkar); Kixmi elurpean (2005, Elkar); Hizkuntza sekretuak (2008, Elkar), Paradisua (2012, Elkar), Familia berria (2012, Elkar).