Antzinako liburuak zaharberritzen ditu Mok, eta liburuei dien maitasuna bere alaba Meggie-ri irakatsi dio. Maggie irakurle amorratua da. Gau batean, gizon misteriotsu bat agertuko da haien etxeko leiho atzean eta, handik aurrera, abenturaz beteriko bidaiari ekingo diote aita-alabek liburu berezi baten bila. Bidaian zehar, bere bizitzako misteriorik handiena argituko du Meggiek: bere amaren desagertzea.

Eleberri magikoa da hau, fantasiazko eleberri bat; liburuen mundura bidaia eta literatur testu unibertsalei maitasun aitormen bat.

Zinemara eraman den eleberri hau trilogia baten lehenengo alea da.

Cornelia Funke Dorsten jaio zen, Alemanian, 1958. urtean. Pedagogia ikasi zuen eta, liburuak idazteaz gain, marrazkiak ere egiten ditu. Haur eta gazte literaturan ibilbide oparoa egin du; besteak beste, aipatzekoak dira Lapurren burua eleberria, Txerrikume pirata ipuina eta Tinta-bihotz eleberria, hirurak ere euskaratuak.