Espainian ezezik, Frantzian ere sortu zen taldearekiko interesa. Bordele, Pabe, Tarbes, Landak etabarretako herrietan egindako emanaldiak arrakastatsuak suertatu ondoren, Frantziako merkatuan sartzen hasteko bi kantuz osatutako maketa grabatzeko eskaintza jaso zuen taldeak. Ordurako Xabi Pery zen gitarra jole berria. Maketa hura Parisko Damiens estudioan grabatu zen baina ez zen inoiz zabaldu. Haatik, taldeak ez zuen Frantziako merkatura zabaltzeko ahaleginean etsi "Euskal Herria jada txikiegia geratzen ari zitzaion-, eta hurrengo diskoa, Ambulance (1987) estudio berean grabatu zuen Parisko teknikariekin. Formatu berria -sei kantu besterik ez- disko kontzeptual bat egiteko baliatu zuen laukoteak. Kritikak berriz goraipatu zuen taldearen lana, nazioartean lehiatzeko kalitatea zuen diskoa zela azpimarratuz: Itoiz, nazioarteko maila duen rock euskalduna (La Gaceta del Norte).